Paasfees

Paasfees was voor Jesus se koms, tradisioneel gehou om die uittog van die Israeliete uit Egipte te herdenk. Dit was die geboortedag van die volk van Israel wat met die paasfees herdenk is.

Jesus is kort voor Paasfees in Jerusalem. Hy verkeer onder uiterste vervolging. Sy lewe is op die spel. Tog word dit amper as vanselfsprekend deur Hom en sy dissipels aanvaar: Hulle sou die pasga steeds soos normaalweg vier! Daar was nie sprake dat hulle iewers sou gaan wegkruip nie, of die gebruik van die pasga sou oorslaan nie! Jesus wou pasga vier. Hy wou die nagmaal in die plek daarvan instel. Dit was vir Jesus die laaste hoogtepunt saam met sy dissipels...

o Maar daar was nog ’n tradisie. Die Jode het geglo, wanneer die Messias, die Verlosser, eendag sou kom, sal hulle verlos word op presies dieselfde dag as waarop hul verlossing uit Egipte plaasgevind het!

o Die tyd waarop Jesus die pasga geëet het, was presies dieselfde dag soos deur God bepaal met die uittog uit Egipte. Hierdie eerste dag van die fees, het in daardie jaar wat Jesus dit gevier het, op die vyfde dag van die week geval. Dit is die Donderdagaand, soos dit vandag vir ons bekend is.

o En hierdie belofte word presies so vervul! Want Christus het die dag na die pasga gesterf! Presies op hierdie dag (jare gelede) het die Jode die marsbevel gekry om uit Egipte te vertrek! Hierdie teken bevestig weer vir ons dat Jesus die ware Messias was. Jesus besef dat Hy op hierdie aand, die voorspelling van God se verlossing jare gelede by die uittog van Egipte, sal vervul. Die paaslam wat geslag sou word by hierdie paasfees, was Hyself.

o Johannes het na Jesus verwys as die Lam van God. Die Paaslam wat ons sonde sal wegneem. (vgl. Joh.1:29 en 36). Geen been van die paaslam mag gebreek word nie – Eks:12:46. En Joh.19:33 sê spesifiek die ander wat saam met Jesus gekruisig is se bene is gebreek, maar Jesus se bene is nie gebreek nie. Jesus het as Paaslam eens en vir altyd ons sonde aan die kruis betaal.

o Paasnagmaal word daardie aand ‘n ander soort uittog. ’n Uittog uit die sonde bindinge. Die begin van die geboorte van ’n nuwe volk wat God vir Hom uitgekies het om Hom te dien en aanbid. Die wat in Jesus Christus, die Seun van God se verlossing glo, sou tot hierdie volk behoort, en ’n nuwe marsbevel kry om die hele wêreld in te gaan en Verlossing van sonde te verkondig!

o Paasfees is die grootste fees wat ons God ooit vir ons nagelaat het. Dit behoort elke jaar die hoogtepunt van ’n Christen se feesvieringe te wees! Dink hoe maklik stel ons’n nagmaal of Paasfees bywoning uit. As ons net moeg is, of kuiermense kry, of effens olik voel... of dit effens moeite is, stel ons die nagmaal af! Ware volgelinge van God gaan nie ligtelik om met wat Jesus gedoen het nie en herdenk die gebeure by Paasfees en ook by die nagmaal.

Mag hierdie paasfees 'n besondere tyd van bepeinsing en dankbaarheid wees.